Mandd Sobhann Sonvsthea Rupeallea Jubleva Son'dorbar Kelolem Ulôvp by Pratapananda Naik, S.J.
Mandd Sobhann
Sonvsthechea Rupeallea Jubleva Son'dorbar Kelolem Ulôvp
Pratapananda Naik, S.J.
30 Novembr 2011
Mandd Sobhannache Gurkar Eric bab, Odheokx Stany bab, Songhottok Arun Raj bab, Upadeokx Rehaman bab, Karyadorxi
Irene bay, Soho-karyadorxi Alfred bab, Khozon’dar Rony bab, Lok Som’pork Odhikari
Victor bab, Pirjent Roy bab, Kolangonn Chairman
Ronny bab, Kolangonn Mukhel Patron Fa. Ramesh Naik, Mandd Sobhannache sande Luvi
bab, Lawrence Pinto, Kingsle Nazareth, Roni Crasta, Navin Lobo, Titus Noronha,
Narayan Kharvi, Kishor Fernandes, Lawrence D’Souza, Sheldon Crasta, Vernon
D’Souza, M.S. Kamat ani Mandd Sobhannachea sandeamno, danimno, borem magpiamno,
Mandd Sobhann sonvsthent seva divpiamno, xikpiamno, Mandd Sobhannachea sorv kolakaramno,
obhimanimno, ixttamno ani soireamno, tumkam somestank Dev bori sanz dium.
Mon’xachea jivitant kaim dis mohotvache astat. Ekê sonvsthechea
itihasant 25 vorsancho kall vhoddlo oxem amchean mhonnunk zaunchem nam. Punn
survilim 25 vorsam ekê sonvsthechi buniad astat hantum dubav nam. Survechim 25
vorsam ekê sonvsthechi mukhli dixa ani vatt tharaytat. Hê nodrentlean pollelear
survilim 25 vorsam ekê sonvsthek chodd mhotvachim.
1986 Novembr 30 ver mhalgoddo Konknni kovi Chfra de Costa, tachea
sangata tea kallar udeun yeuncho kovi Melvyn Rodrigues ani songitkar Eric
Ozario hankam Konknni bhas, sonvskruti ani songit samballunk, tanchi vaddavoll
korunk ani fuddlê pillgek diunk poddlolem ek soponn Mongllurchea Woodland Hotelant sanjechea 6.00
orancher manddun haddlolê karyavolli udexim zolmak ailem. Tea vellar tanchem tem
soponn somzun ghetlole bhov thodde. Zaiteank tem ek pixem soponn koxem dislem
astolem. Pixe ani xanne hanche modhem aschem ontor bhov thoddem oxem mhonntat.
Hakach lagun pixe, xanne astat ani xanneamni korchim kamam pixeponn koxem
dista. Tea disa poddlolem tem soponn az fokot soponn urunk nam, tem khorem
zalam. Mandd Sobhann nanvacho 25 vorsancho êk ghottmutt, puddpuddit, sobayecho
rongit ruk zala. Panamni, fulamni ani follamni bhorun to ruk az Konknni
kolakarank asro dita, savlli dita, varem dita, kola premink Konknni bhaxecho
pormoll, svad, goddsann dit asa. Hea rukachem mohotv, sthan ani man utramni
sangunk zaunchem nam. Tea rukachê savllent yetoch kuddik, kallzak, motik ani
otmeak Konknni kolechea khannachi ruch lagta. Tea vellar matr Mandd Sobhann rukachi
khori ollok zata ani zhollok mellta.
25 vorsam adim heach disa zal’lê Mandd Sobhannachê poilê songit
karyavollint Mandd Sobhann nanvachea gitantlean Mandd Sobhannachi ollok Chafrachea
utrantlean ani Ericachea songitantlean zali.
Mandd Sobhann mhollear kitem
Mhonna nakat ami nenna
Sontosachê zhorik mhonna
Mandd Sobhanna, Mandd Sobhanna.
Kinnkulleanchim ghonna ghonna
Painzonnanchim zhonna zhonna
Utram tankam melloy tor tim
Mandd Sobhanna, Mandd Sobhanna.
Kovitek novro mhonna
Vajop talak hokol mhonna
Tanchem login ghoddta tednam
Mandd Sobhanna, Mandd Sobhanna.
Ami manddar char boddam
Mukar tumi mhazonnam
Amcho mog ghoddot tednam
Mandd Sobhanna, Mandd Sobhanna.
Oxi Mandd Sobhann Songit pongddachi survat zali ani tachi ollok Konknni
porjek sonvsarbhor atam zalea. Konknnint mandd
mhonnlear êk matxi unch aschi suvat. Bazarant bhajianche, follanche, fulanche
mandd astat. Toxench lok gitam ani nach sador korunk mandd astat. Dekik dhalo
nachunk dhalancho mandd asta. Sobhann
mhonnlear sobay dita tosoli êk bori karyavoll.
1992 vorsa Mandd Sobhann songit pongddak sonvsthechem rup dilem ani
Mandd Sobhann songit pongodd, Mandd Sobhann nanvachi sonvstha zali. Mandd
Sobhann sonvsthen aplea nanvak sobtat tosoleo lhan, modhyom’ ani vhodd
promanncheo kileo-xeoch karyavolli manddun haddleat ani teo lokachea kallzamni
ani motimni khonchun urleat. Teo karyavolli ekê sanklli porim. Sankllichem ek
pont matr dista. Dusrem pont disonam. Kiteak ti sankoll disachea disa voddot veta.
Mandd Sobhannachea karyavollinchi ani vavrachi volleri sangunk gelear oranchim
oram lagtolim. Dekun tantlea kaim mukhel karyavollincho matr hanv ul’lekh
kortam.
1988: Poilo Konknni Baila Shaw Mongllurantlea Padva
moidanar zalo.
1991:
1992: Mongllurantlea KACES, Balmatta moidanar 9 disanchi Konknni
sanvskrutik Porob.
1993: Mongllurantlea Nehru moidanar 23 disanchi Okhil Bharot panvddear Sant.
1993: Saint Agnes Special School
hanga Baila International Shaw.
01 Dezembr 1996: Sokallim Kolangonnachê buniadicho fator dovorchi
karyavoll ani sanjer St. Agnes Special
School moidanar Punov songit
karyavoll.
2003: Sant Luvis kolejichea moidanar Manddo Utsov. 25 songitkar ani 954 gavpeancho hantum aspav aslo.
2004: Kolangonnant 8 disancho Konknni sador kolecho Konknni mhotsov.
26 ani 27 Janer 2008: Kolangonnant Nirontori.
1711 gavpeamni 40 oramni 645 podam, gitam gavun Konknni bhaxek poilê pavtti
Guinness Bukachea dakhleanchea zomeant manachea zagear bosoyli.
Novembr 25 thaun 19 Dezembr 2010: 25 disancho Vishv Konknni Sanvskrutik
Mohamell Kolangonnant vortea dobajean zalo. Ekê Konknni karyavollik
poilech pavtti Bharotachea Raxtropotik haddoyloli kirt Mandd Sobhannak mellta.
20 Agost 2011: Sonvsarbhor ximpoddlolea Konknni sonvsthank ekttaim
haddunk Jagotik Konknni Songhotonn
sthapon kelem.
1995 vorsa Mongllurant zal’lo Poilo
Vishv Konknni Sommell ani 2005 vorsa Mongllurant ghoddoun haddlolo Canara Kotholik Jagotik Sommell he doni
sommell manddun haddunk ani zoitevont korunk Mandd Sobhannacho vantto xinvacho also
mhonnlear chuk zaunchi nam.
Him sogllim vhoddlim karyim manddun haddtanam Sobhann karyavollinchi lamb
sankoll chaluch asli. Mandd Sobhann, Angonn Sobhann, Gumott Sobhann,
Bhurgeanlem Sobhann, Pallnnea Sobhann, Jevonn Sobhann, Mattov Sobhann, Bhokti
Sobhann, Nach Sobhann, Songit Sobhann, Moga Sobhann, Kovita Sobhann, Yuva
Sobhann, Cholianlem Sobhann, Fokann Sobhann, Konknni dorxon, Sobhann Sanz,
dobazo, Brass Band concert, mandd
rong proyog, bosnni, gim’ zaum pavs zaum chukonastanam zaunchi Mhoinealli
Manchi hanchi ek lamb sankoll ubi kelea. CD, VCD, pustokanchi uzvaddavnni,
bhonvddio, yatra, Baila Shaw,
xibiram, daiza punzo; nach, songit ani nattok hancheo torbeti karyavolli, Sod
1, 2 ani atam 3; Jagotik Konknni Songit Inam’ 1, 2 ani atam 3 adi, adi, iteadi hi
sankoll aikotanam, polletanam tokli ghunvli zalear ojap nhoi. Dharmik mollar
zaiteank rag haddounchem ani halounchem tosolem vad vivad zaunk sokchem Zudas nattok poilem Kolangonnant
bhiyeun bhiyeun, toripunn magir Roshni Nilayant dhiran ubi kel’li samorthi
Mandd Sobhannachi.
Mandd Sobhannak hanv kitea kodden sor korum? Mandd Sobhann mhonnlear ek
voddacho ruk. Voddachea rukak pallam ani follam kitlim, tim konn mezta? Kaim
pallam mortanam novim pallam futtat ani voddacho ruk vistarun veta. Manest Eric
Ozario Mandd Sobhannacho otmo va prann. Tache hat, dolle,
1972 vorsa pasun mhaka chafrachi ollok ani uprant tache lagim sombond. 1987
vorsa Gõyant Sanklle ganvant zal’lea Konknni Lekhok sommelona vellar Chfran mhaka
Eric Ozariochi ollok korun dili. Tache adim Eric Ozario ani Joyce hanchim nanvam
Konknni Nattok Sobhechea Songit Spordechea rizolttachea sondorbar Raknnear hanv
vachtalom. Eric Konknni songitkar. Hanv Konknni bhasvijnani. Tea vellar amche
modlo ganch mhonnlear Konknni. Her kaim chodd sombond naslo. 1992 vorsa Chafran
ho sonvsar soddlo. Parvo vetoch dusro parvo na zalear kavllo bhitor sorta toso
hanv Eric babachea Konknni sonvsarant bhitor sorlom. Tannench mhaka aplea
sonvsarant bhitor haddlo mhonnchem chodd sarkem. Hanv ani Eric itle lagim
aileanv. Ekach nanneacheo ami don kuxi, veglleo tori vingodd korunk zainant tosoleo.
Atam amcho sombond ixttagoticho va bhavponnacho va donui mhonnum yeta va tache
poros chodd.
Hanv ek sod vavr korpi. Itlem asun soit Mandd Sobhanna vixim mhaka sodam kaim sovalam motint yetat
ani tea sovalank mhaka azun zap mellonam. Tim chintunk gelear mhoji tokli ghunvunk
lagta. Tim sovalam him: Mandd Sobhann itlea probhavi ani akorxit thoran
thambonastanam Konknnicho itlo vavr korta, to koso korta? Poixe asun korta va
nastanam korta? Hea vavrak zai zal’le poixe koxe haddta? Khoim thaun
haddta? Konna lagim magta? Portean protean
maglear konn adar dita? Eka pattlean êk apleo karyavolli zaiteank sangata gheun
xistin ani dobajean korta. Hem sorv koxem zata? Hea prosnank mhoje lagim zap
nam. Eric baba lagim vicharcho dhir mhoje lagim nam. Dekun Mandd Sobhann, mhaka
somzunk zainaslo ek mister, ek gutt, ek
novol, ek ochoryem, ek ojap, ek vizmit, ek humannem, ek gupit zalam. Mandd
Sobhannan aplea dollbharak gheun korcho karbhar polletanam hanv khorxetam ani
dhapetam.
Boram aslole borik matr bhurge fator martat. Mandd Sobhannache zaite
obhimani asat toxech kaim muttbhor dusman soit asat. Eka kallar Mandd Sobhannak
“Mandd Kurponn” oxem te fokanddam kortale. Mandd kurponn xit vallunk gorjecheo
vostu dekun teo Konknni sonvskrutecho vantto hem sadem ani chaltem sot somzun
gheunchi takot nasloleank, Mandd Sobhann xikhorachi unchay ani tea somdirachi
gundday koxi somzotoli? Rostear host vetanam zaitim sunnim tika polleun
bhonktat. Punn hostik tanchem bhem nam va tanchi porva-i nam. Ti aple vatten
cholot ravta. Dusmananchi tthika sarem korun Mandd Sobhann bolladik ruk zala. Mandd Sobhann zor
dhormachea vhoddilanchi sonvstha zal’li zalear Kristanv porza obhimanan mhonnta
asli “hi amchi sonvstha” ani tika tenko dita asli. Punn borea noxiban oxem hanv
mhonntam Mandd Sobhann layikamni layikam khatir cholounchi Konknni sonvstha.
Tika zat, kat, rong, boli, lipi, dhorm, votthar osle bhed bhav lagonant. Dekun
ti khorich Konknni porjechi sonvstha zalea oxem mhaka dista.
Pattlea 25 vorsamni Mandd Sobhannan Konknnichea vivid mollamni tolamolacho
vavr kela. Tachi gorz asli. Hea mukhar hench dhoronn mukhar vochunk zai va
fokot kaim mollancher nodor thiravun, fuddem vochunk zai, ho nirdhar Mandd
Sobhannan korcho poddtolo. Bhurgeaponnar ani tornatteaponnar monis hullhullea
gunnancho asta. Pray bhortoch aplea ani heranchea onbhogancher adharun to kaim
gombhir vixoyancher apli nodor thirayta. Hem motint dhorun Mandd Sobhannacho êk
lagxilo ixtt mhonnun Mandd Sobhannan khoinchea mollamni chodd kam’ korchem
hache vixim kaim suchovnnio kortam.
1.
Mandd Sobhannak
lagun bore gavpi, gavpinni, vazovpi, nachpi ani nachpinni toyar zaleo. Mandd
Sobhannachem songit, songit mollar eka veglleach prokarachem songit. Taka aplem
mhonnlolem khaxeleponn, apleponn asa. Tem khaxeleponn samballun gitank songit
diunche songitkar Eric babachea pattlean Konn torui asat kai? Hanv nennam.
Mandd Sobhannan hacher chintchem.
2.
Karnatakant
Konknni nattok kola denvnner asa. Ti kola voir kaddunk jim pavlam Mandd
Sobhannan marleant tim mukhar vhorchim. Ninasom’ sonvsthechea sohokaran vivid
prokarachim Konknni nattkam jivall zaunchi gorz asa. Ho vavr Mandd Sobhann matr
korunk sokta.
3.
Tornatteam modem
Konknni songit gavunchi umed vaddounk Sod karyavoll mukhar vhortanam 8 te 15
vorsam bhitorlea bhurgeam khatir Sod karyavolli suru kelear boreo zatit. He
karyavollik lagun bhurgim Konknni songita kodde yetolim.
4.
Funkchim
vazontram (blowing instruments) vazovpi atam unnem zaunk lagleat. Punn Gõyant
Tiatr Academyk lagun atam tornattim, cholio soit him vazontram xiktat. Hachi ek
zhollok heach vorsa Dezembr 11 ver hanga zaunche karyavolli velar tumkam
polleunk melltoli. Mandd Sobhannan hangachea tornatteank Brass band xikouncho proyog kelear boro zait.
5.
Marathi
sonvskrutent Lavnni nanvacho ek veglloch
lok nach prokar asa. To Konknni gitank sobta. Ho nach prokar Kolangonnant
xikoylo zalear Konknni nachak ek vegllem rup ani rong yet.
6.
Konknnint film
toyar korchi porom’pora unni. Kiteak filmam toyar korunk chodd khorch bosta.
Punn ek lhan kanni gheun 20 te 30 mintanchim unnea khorchar DVD filmam toyar
zalim zalear tancheo dakovnno ganvam ganvamni zaum yetat. Hantlean film nott,
notti tayar zatat ani Konknni film toyar korchi ek sonvskruti nirmann zatoli.
7.
Her bhasanchim
chenalam asat. Lok tim umedin polleta ani tantlean teo bhaso sanvskrutik mollar
porzolltat. Konknni bhaxek aplench mhonnlolem ek chenel zai. Chenel mhonnlolea
mazrak ghantt konn bandolto? Bandlear fokot Mandd Sobhannan. Heram koddlean hem
zaunchem kam’ nhoi.
Mandd Sobhann sonvstha aplim folladik 25 vorsam
puray korchea aichea hea subhagi disa tiche vixim ulounk mhaka bilkul favo nam.
Mhoje poros Mandd Sobhannak lagim asche ani ulounk takot asche zaite takotdar mhan
monis astanam tankam soddun mhoje tosolea songit ani machie lagim sombond
naslolea, Konknnint fokot suko sod vavr korchea mon’xak kiteak apoylo ho-i
mhaka ek mister. Itlem asun soit mhaka dil’lea suyoga khatir Eric babak ani
akhea Mandd Sobhann ghoranneak hanv Dev borem korum mhonntam ani tankam borem magtam.
Devachem besanv tancher asum ani tankam borea ani udar monachea mon’xancho
sohokar ani adhar sodam labhum mhonn axetam.
Ani xevottak Mandd Sobhann tosolea mhasagora vixim
hanv choddit kitem sangum?
Mandd Sobhann mhonnje kitem?
Mhaka konnem sanglear zatem.
Xanneanchem soponn pixem
Mhaka pixeak kollchem koxem?
Mandd Sobhann mhonnje kitem?
Mhaka konnem sanglear zatem.
Konknnichem hem humannem
Parkitoleak layta pixem.
Mandd Sobhann mhonnje kitem?
Mhaka konnem sanglear zatem.
Mandd Sobhann ghorannem hem
Konknni mayechem tthikann tem.
Mhojim 1986 utram aikunchi sosnnikay tumi dakoyli
dekun tumakam somestank Dev borem korum.
Comments
Post a Comment